Արդեն 80 տարի ունենք քրդական ռադիոհաղորդումներ: Այսօր այս մասին լրագրողների հետ խոսեց Հայաստանում քրդական համայնքի ղեկավար Կնյազ Հասանովը: 

Բանախոսը հայտնեց, որ քրդերեն ռադիոհաղորդումները մեծ հետաքրքրություն են վայելում և մեծ կրթամշակութային դեր ունեն: 

«Քրդական ռադիոհաղորդումները մեծ ազդեցություն են թողել արտասահմանյան 40 միլիոն քուրդ ժողովրդի մեջ: Հատկապես Թուրքիայում ապրող 20 միլիոնի վրա, քանի որ այնտեղ քրդերեն խոսելն արգելված է»,- նշեց բանախոսը` մանրամասնելով, որ Թուրքիայում պետականորեն արգելել են քրդերեն լեզուն. այն չի դասավանդվում դպրոցներում և ոչ էլ կան հաղորդումներ: 

Այդ պայմաններում հայկական ռադիոյի քրդական հաղորդումներ են փրկությունը: 

Հարևան երկրների քրդերը չափազանց մեծ տեղ են վերագրում այդ հաղորդումներին, և ՀՀ քրդական համայնքի ղեկավարի միջնորդությամբ իրենց գնահատանքի խոսքերն են փոխանցում Հայաստանին: «Մեծ երախտագիտություն են հայտնում Հայաստանի իշխանություններին, որովհետև քրդական ռադիոն Թուրքիայում, Իրաքում, Իրանում և Սիրիայում ազգային զարթոնք է առաջացնում»,- նշեց բանախոսը: 

Հայկ Կիսեբլյան