 Ո՞վ է ուզում դառնալ միլիոնատեր…
Վարդան Բոստանջյանը, Aravot.am-ի հետ զրույցում,հերքեց մամուլում հրապարակված տեղեկությունը, թե ինքը «Ո՞վ է ուզում դառնալ միլիոնատեր» հեռուստահաղորդման ժամանակ համակարգչի առաջադրած հարցը սխալ է կարդացել, բայց խաղի «զանգ ընկերոջը» օգնության ժամանակ կինը տվել է ճիշտ պատասխան. «Մինչեւ զանգ կնոջս, ես հարցին արդեն ճիշտ պատասխանել էի, պատասխանից հետո էլ հարցը ճիշտ ներկայացրել եմ: Ինչ վերաբերում է նրան, որ մամուլում ինձ ներկայացնում են չարքաշ պատգամավոր, ես չարքաշ լինել չեմ կարող, արդեն երեք դար է Բոստանջյան ազգանունները եղել են հայկական ժողովրդական աղաներ»:
Պատգամավորը հերքեց նաեւ, որ այս խաղի ժամանակ իրեն նախապես ներկայացրել էին հարցերի ճիշտ պատասխանները. «Իմ ունեցած դոկտորի, ակադեմիկոսի կոչումները հաշվի առնելով, ո՞ր կտրվածքով պատասխանեմ… հնարավոր չէ, սուտ է: Սա բարեգործական նպատակով կազմակերպված խաղ էր, դրա համար էլ ինչ սուտ ասես տարածում են»:
Հիշեցնենք, որ մամուլի հրապարակման համաձայն ԱԺ պատգամավորը, խաղի ընթացքում զանգ ընկերոջ հնարավորությունից օգտվելով՝ զանգել էր կնոջը ու համակարգչի ներկայացրած հարցը սխալ էր կարդացել, բայց կինը տվել էր ճիշտ պատասխանը: Մեջբերում ենք. «843թ. Վերդենի պայմանագրով փաստորեն ստեղծվեց երեք մեծ պետություն: Ո՞րը չի մտնում այդ երեքի մեջ՝ 1. Ֆրանսիա, 2. Գերմանիա, 3. Իսպանիա, 4. Իտալիա»: Թերթի համաձայն, պարոն Բոստանջյանը հարցը կնոջը ներկայացրել էր այսպես. «Անահի՛տ, 843թ. Վերդենի պայմանագրով, ստեղծվեց երեք պետությունների միություն, ուրեմն դրա մեջ ինչ-որ մեկը չէր մտնում: Այդ երկրները, որը էստեղ նշված է՝Ֆրանսիա, Գերմանիա, Իսպանիա, Իտալիա, ո՞ր երկիրը չէր մտնում պայմանագրի մեջ»:
Նյութը` aravot.am –ից Արփինե ՍԻՄՈՆՅԱՆ ՀՈՒՆՎԱՐ 13, 2012 11:51
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|
