ՄԱՅՐ ԹԵՐԵԶԱՅԻ ՍԻՐՈ ՆՎԵՐԸ
Մայր Թերեզային սուրբ էին համարում դեռ կենդանության օրոք: Նրան բաժին էր ընկել դժվար և երջանիկ առաքելություն. արդեն որերորդ անգամ մարդկանց ավետել, որ Աստված հենց ինքը սեր է, և յուրաքանչյուր մահկանացուի կյանքի իմաստը սա է. սիրել և լինել սիրված: 20-րդ դարում Մայր Թերեզան ոչ միայն գթասրտության խորհրդանիշ էր, այլև օգնական քույրերի հետ ռեալ ուժ էր ներկայացնում, որի հետ չէր կարելի հաշվի չնստել: Նրանով հիանում էին, նրա առաջ խոնարհվում էին, նրան աստվածացնում էին: Նեպալի մայրաքաղաք Կատմանդուում մի ծերանոց կա: Այստեղ է նաև Մայր Թերեզայի սենյակը: Սենյակի պատերին գրված է. «Կյանքը հնարավորություն է, բաց մի թող այն: Կյանքը գեղեցկություն է, հիացիր նրանով: Կյանքը քո առաքելությունն է, կատարիր այն: Կյանքը խաղ է, խաղա: Կյանքը սեր է, սիրիր: Կյանքը գաղտնիք է, բացահայտիր այն: Կյանքը ողբերգություն է, դիմացիր: Կյանքը կյանք է, փրկիր այն: Կյանքը երջանկություն է, արարիր այն ինքդ: Արժե ապրել, մի ոչնչացրու քո կյանքը»: Իսկ Նյու Յորքում գտնվում է Մայր Թերեզայի հիմնադրած օթևանը՝ ՁԻԱՀ-ով հիվանդ մարդկանց համար: Այն կոչվում է «Սիրո նվերը»: Իսկ սրանք Մայր Թերեզայի պատվիրաններն են հենց քեզ համար, նրա սիրո պարգևը: «Շատ հաճախ մարդիկ կարող են լինել անհասկացող, անտրամաբանական ու եսակենտրոն: Միևնույն է, ներիր նրանց: Դու կարող ես լինել բարի ու ազնիվ, բայց մարդիկ քեզ կմեղադրեն կեղծավորության ու նենգ նպատակների մեջ: Միևնույն է, եղիր բարի և ազնիվ: Դու կարող ես երջանկություն ու հոգու խաղաղություն գտնել, մարդիկ կնախանձեն քեզ: Միևնույն է, եղիր երջանիկ: Այն, ինչ կկառուցես տարիների ընթացքում, ինչ-որ մեկը կքանդի մեկ օրում: Միևնույն է, կառուցիր: Դու կարող ես մարդկանց տալ քո ունեցած ամենալավը, և դա կարող է նրանց բավարար չլինել: Միևնույն է, տուր նրանց քո ունեցած ամենալավը: Եվ ի վերջո դու կհասկանաս, որ այդ ամենը տեղի չի ունեցել քո և մարդկանց միջև: Այդ ամենը տեղի է ունեցել քո և Աստծո միջև…»:
Նյութը` mocak.am –ից հինգշաբթի November 11, 2011
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|