RQ-170 Sentinel
Իրանը մտադիր է ուսումնասիրել ԱՄՆ-ի Կենտրոնական հետախուզական վարչության անօդաչու սարքի տեխնոլոգիաները, և դրանց օգնությամբ ստեղծել իր անօդաչու սարքը: Այս մասին «Press TV» հեռուստաընկերությանը հայտնել է Իսլամական Հանրապետության Ազգային անվտանգության հանձնաժողովի ներկայացուցիչ Հոսեին Էբրահիմին:
Հիշեցնենք, օրեր առաջ իրանական լրատվամիջոցները հաղորդել էին երկրի արևմտյան հատվածում խփված «RQ-170 Sentinel» տեսակի ամերիկյան անօդաչու սարքի մասին: Իրանական կողմը հայտարարել էր, թե անօդաչուն խփվել է էլեկտրոնային հիբերհարձակման արդյունքում և զինվորականներին է անցել առանց նկատելի վնասվածքների:
Ամերիկյան վարչակազմի աղբյոյւրներն հաստատել էին անօդաչուի կործանման փաստը, սակայն նշել էին, թե այն Իրանի տարածքում ընկել է վառելիքի սպառման արդյունքում, քանի որ ավելի վաղ դուրս էր մնացել ԿՀՎ-ի վերահսկողությունից: Իրանցի պաշտոնյան, մեկնաբանելով սարքի ընթացիկ ուսումնասիրությունները մասնագետների կողմից, հավելել է, թե իրանական անօդաչուն առավել կատարելոգործված մոդել է լինելու և որ այն իր մանևրային հատկություններով գերազանցելու է «RQ-170»-ին:
Նշենք, ամերիկյան փորձագետներն ավելի վաղ մտահոգություն էին հայտնել, թե անօդաչու սարքի գերժամանակակից տեխնոլոգիաները կարող են փոխանցվել Ռուսաստանին և Չինաստանին:
Նյութը` news.armeniatv.com –ից 2011-12-13 00:45
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|