 Հայաստանի բասկետբոլի ֆեդերացիայի խորհրդի որոշմամբ…
Տղամարդկանց ազգային հավաքականի գլխավոր մարզիչ է նշանակվել Կարլ Բարդակյանը, ում գլխավորությամբ Լոս Անջելեսի թիմը դարձավ 2011թ. Համահայկական խաղերի հաղթող: ՄԱՄՈՒԼ.am լրատվականի թղթակցին ՀԲՖ-ի մամուլի քարտուղարությունից հայտնեցին, որ բասկետբոլի ֆեդերացիան հաշվի է առել Բարդակյանի` Համահայկական խաղերում շարունակաբար ցուցաբերած դրական արդյունքները, ինչպես նաև ԱՄՆ-ում ձեռք բերված հարուստ մարզչական փորձը: Բարդակյանի գլխավորությամբ Հայաստանը պետք է պատրաստվի ամռանը կայանալիք Եվրոպայի C դիվիզիոնի առաջնությանը: Բասկետբոլի ֆեդերացիան հույս ունի, որ Բարդակյանին կհաջողվի համախմբել հայ լավագույն բասկետբոլիստներին և հասնել դրական արդյունքի:
 Հիշեցնենք, որ 2011թ. ամռանը եվրոպական բասկետբոլում Հայաստանը ներկայացված էր մինչև 16 տարեկանների պայքարում, որտեղ հայ պատանիները 6-րդն էին B դիվիզիոնի 23 մասնակիցների շարքում, ինչը բացառիկ արդյունք էր հայկական բասկետբոլի պատմության մեջ: Ավելի վաղ՝ 2010թ., Հայաստանի կանանց ազգային հավաքականը դարձավ Եվրոպայի C դիվիզիոնի առաջնության արծաթե մեդալակիր, իսկ 2009 և 2010թթ Եվրագավաթի խաղարկությանը մասնակցեց Երևանի ''Հատիս''-ը: Այժմ հերթը տղամարդկանց մեծահասակների հավաքականինն է, որի ելույթներին հայ մարզասերները վաղուց են սպասում: Ավելացնենք, որ Եվրոպայի C դիվիզիոնի առաջնությունը մեկնարկելու է հուլիսի 2-ին Սան Մարինոյում: Շուտով Հայաստանի անունը կավելացվի մասնակիցների շարքում:
mamul.am 01/02/2012
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|
