 Աղանդները «գրոհել» են համացանցը…
Եվ ի տարբերություն շատերի, իրենց տրված հնարավորություններն օգտագործում են մաքսիմալ կերպով: ՀՀ-ում կան բազմաթիվ աղանդավորական խմբակներ: Հատկապես վտանգավոր են «Կյանքի խոսք» և «Եհովայի վկաներ» աղանդները: Չնայած դա չի նշանակում, որ մյուսները պակաս վտանգավոր են: Տեղեկատվություն տարածելու և լայն մասսաների ուշադրությունը գրավելու ամենա հարմար և ժամանակակից միջոցը համացանցն է: Օգտագործելով «Facebook» սոցիալական ցանցի ընձեռած հնարավորությունները` բազմաթիվ աղանդների ղեկավարներ, ակտիվիստներ և ուղղակի մանիպուլացված անդամներ, կայքում հաշիվներ են բացում, ստեղծում են խմբեր և այդ խմբերի մեջ ներգրավում հազարավորների: Շատերը անգամ պատկերացում չունեն, թե ինչպիսի գործունեություն ծավալող խմբեր են դրանք և ինչ կազմակերպությունների են պատկանում: Աղանդավորները ուղղակի գրոհել են համացանցը, իրենց կեղտոտ լոզունգներով և Աստվածաշնչի հետ ոչ մի կապ չունեցող պատվիրաններով ու հորդորներով: Կապ չունեցող են այնքանով, որ ցանկացած պատվիրան և մեջբերում, մեկնաբանվում է այսպես կոչված «հովվի» (առաջնորդի) կողմից և մատուցվում է իբրև բացարձակ ճշմարտություն: Այնինչ Աստվածաշունչը ամենամեծ գիտությունն է և այն պետք է կարդալ և հասկանալ անձամբ, ոչ թե այլոց միջամտությամբ: Պետք է զգուշանալ տարօրինակ բովանդակություն ունեցող facebook-յան խմբերից: Ովքե՞ր են դառնում աղանդավոր, ինչպե՞ս կարելի է մարդուն ներքաշել նման շարժումների մեջ, ինչպե՞ս են աղանդավորները զոմբիացնում մարդու ուղեղը, ի՞նչ վտանգ են իրենցից ներկայացնում աղանդները, ո՞րոնք են այդ վտանգների հետևանքները…Սրանք հարցեր են, որոնք ունեն իրենց հստակ պատասխանները: Հուսահատված և անլուծելի խնդիրներ ունեցող մարդկանց աղանդավորական կազմակերպության մեջ ներքաշելը բավականին հեշտ է: Ոմանք հենց իրենց հարազատների ձեռքով էլ դառնում են աղանդավոր, սակայն պանիպուլացիոն տեխնիկան այնքան ուժեղ և ազդեցիկ է, որ անգամ դառնալով որևէ աղանդի անդամ, երկար ժամանակ կարծում են, որ եկեղեցի են այցելում և հենց եկեղեցի էլ կոչում են այդ «հավաքատեղին»` պղծելով եկեղեցու անունը: Ոմանց ուղեղը փողոցում է ստացվում «լվանալ», ոմանք էլ սեփական կամքով են ներքաշվում` հուսահատությունից և փրկություն գտնելու մտքից ելնելով: Խմբակների բազմաթիվ անդամներ հոգեկան շեղումներ են ունենում և դիմում են հոգեբանի, հաճախ նաև` հոգեբույժի օգնությանը: Այս երևույթները առաջ են բերում անհատականության քայքայում հետևյալ ասպարեզներում. • ֆիզիկական` անլիարժեք սնում, անբավարար քուն, լարված աշխատանք • հոգեկան` անհատականության, վարքի և քննադատական դատողության խեղդում • մտավոր` տվյալ աղանդի հետ կապ չունեցող գիտելիքների աղքատացում • սոցիալական` հաղորդակցության ունակության կորուստ, համընդհանուր թշնամանք հասարակականգործունեության և շրջապատի նկատմամբ: Քննադատական նկատողությունները, ագրեսիվությունը, վիրավորանքը, զրպարտանքը, հին շրջապատից օտարացումը, ծնողների հետ երեխաների ունեցած կապերի խզումը, բաժանությունը իրենց հերթին հանգեցնում են ընտենական կյանքի քայքայմանը, ինչի հետևանքով քայքայվում է նաև հասարակությունը: Պետք է հասկանալ, որ այս ամենը նախ և առաջ «բիզնես» է շատերի համար` փող աշխատելու միջոց: Այդ փողը հիմնականում ձեռք է բերվում այն հազարավոր մարդկանց շնորհիվ, ովքեր ներքաշվել են տվյալ աղանդի մեջ: Աղանդները վստահեցնում են, որ ամեն անգամ բոլորը պետք է նվիրատվություն (հանգանակություն) անեն, և դրանով իսկ հարգել Աստծուն: Դժվար է հասկանալ, թե Հայ Առաքելական եկեղեցու պատերից դուրս արվող, ի՞նչ հանգանակության մասին կարող է խոսք լինել: Առաքելական եկեղեցին նույնպես ունի իր թերացումները, չկա հասարակության և եկեղեցու միջև բավարար կապ /սա նույնպես խնդիր է/ և մարդիկ փորձում են «հոգևոր սնունդ» ու փրկություն գտնել այլ կերպ` աղանդավորների շարքերը համալրելով:
interpress.am Ֆենյա Խաչատրյան 03.03.2012
|
