 «Չենք լռելու»-ին Մայր Աթոռը չի հովանավորում
«Ապագան մերն է» քաղ. նախաձեռնության ղեկավար Արմեն Ադամյանը Մայր Աթոռին մեղադրում է «Չենք լռելու»-ի հետ կապ ունենալու մեջ: Մայր Աթոռի Տեղեկատվական համակարգը տարածել է պատասխան գրությունը, որ ներկայացնում ենք ստորեւ` առանց խմբագրության:
Տարակուսանքով ծանոթացանք «Ապագան մերն է» քաղաքացիական նախաձեռնության ղեկավար Արմեն Ադամյանի դեկտեմբերի 17-ի հայտարարությանը, որով Մայր Աթոռ Ս. Էջմիածնին և Ամենայն Հայոց Կաթողիկոսին է վերագրում «Չենք լռելու» երիտասարդական շարժման գործունեության հովանավորությունն ու ուղղորդումը, հակառակ այս առնչությամբ ժամանակին Մայր Աթոռի կողմից արտահայտված դիրքորոշման:
Քաղաքացիական հասարակությունը և առավել ևս քաղաքացիական նախաձեռնությունները չեն կարող զրպարտանքի վրա կառուցվել: Դատապարտում ենք այս նախաձեռնությունը, որի ղեկավարը, ուղղակի կեղծ և անհեթեթ վերագրումներ կատարելով, նպատակ է հետապնդում ստվերել Հայոց Եկեղեցու և Ամենայն Հայոց Հայրապետի հեղինակությունը:
Հորդորում ենք մեր հասարակությանը չտրվել միտումնավոր նման ապատեղեկատվության ազդեցությանը: Մայր Աթոռ Ս. Էջմիածինն այլոց նման պետք չունի դիմելու նմանօրինակ միջոցների` արտահայտելու իր կեցվածքը մեր հասարակության կյանքն ալեկոծող տարբեր երևույթների նկատմամբ:
Նյութը` Վահրամ քահանա Մելիքյանից Մայր Աթոռի Տեղեկատվական համակարգի տնօրեն
19.12.2011
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում: | 
