 Հայկական եկեղեցում անհարգալից պահվածքի համար վրացի երիտասարդները բերման են ենթարկվել
Վրաստանի ոստիկանությունը քրեական գործ է հարուցել Հայ առաքելական եկեղեցու վիրահայոց թեմի առաջնորդարանից ստացած դիմումի հիման վրա, ըստ որի օգոստոսի 19-ին ազգությամբ վրացի 2 երիտասարդներ, անսթափ վիճակում մտել են Հավլաբարի Սուրբ Էջմիածին եկեղեցի եւ հատկապես նրանցից մեկը ագրեսիվ ու անհարգալից վերաբերմունք է ցուցաբերել հայկական եկեղեցու նկատմամբ:
«Ազատություն» ռադիոկայանին տված հարցազրությում վիրահայոց թեմի առաջնորդ Վազգեն եպիսկոպոս Միրզախանյանն ասաց, որ եկեղեցու հավաքարարն ու մոմավաճառը չեն կարողացել կանխել երիտասարդների գործողությունները:
«Մոտենում է խորանի առջեւ դրված ավետարանին, թերթում է դա շատ դեմոնստրատիվ եւ արհամարհական կերպով եւ պատռում թերթերից մեկը: Հետո փորձում է մուտք գործել քահանաների սենյակ: Այդ ագրեսիվ երիտասարդը ոտքը դնում է գահի վրա, նստում», - պատմեց Վազգեն եպիսկոպոս Միրզախանյանը:
Թեմի առաջնորդը նաեւ նշեց, որ երիտասարդներն անհարգալից խոսքեր են ասել հայ եկեղեցու եւ հայության հասցեին: Եկեղեցուց դուրս գալիս նրանք պատռել են եկեղեցու դռներին փակցված հայտարարության թերթիկները եւ ցուցադրաբար այրել դրանք: Մինչ տարածքում աշխատող շինարարները կմոտենային, երիտասարդները նստել են ավտոմեքենա եւ հեռացել:
Վրաստանի ոստիկանությունը արդեն սկսել է քննչական գործողություններ իրականացնել: Երիտասարդներին բերման են ենթարկել: Եկեղեցու աշխատակիցներն ու ականատեսները ցուցմունքներ են տվել: Վազգեն եպիսկոպոս Միրզախանյանն ասաց, որ այժմ արդյունքների են սպասում:
«Մենք, ճիշտն ասած, կողմ չենք, որ այդ երիտասարդները դատվեն: Դրա կարիքը գուցե չկա: Բայց ուղղակի` ինչ-որ պետք է, թող իրենք իրենց պատիժը ստանան, որ մյուսներին էլ դաս լինի», - նշեց նա:
Նյութը` Azatutyun.am 23.08.2011 Կարինե Սիմոնյան -ից Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
| 
