Մայր Աթոռի դիվանապետի մեկնաբանությունները Շվեյցարիայի հայոց թեմի իրարանցումների մասին
Արարատյան Հայրապետական թեմի առաջնորդարանի սրահում մամուլի ասուլիս էր: Օրվա թեման` Շվեյցարիայի հայոց թեմում ծավալվող իրարանցումն էր և տեղի քահանա` Տեր Աբել Մանուկյանին կարգալույծ անելու պատմությունը:
Բանախոս` Մայր Աթոռ Սուրբ Էջմիածնի դիվանապետ Տեր Արշակ եպիսկոպոս Խաչատրյանի խոսքերից պարզվեց` կարգալույծ արված քահանան` Տեր Աբել Մանուկյանը, 1990-ականների սկզբին ինքնակամ է լքել Կանադայի հայոց թեմը և «հայտնվել» Շվեյցարիայում: Այդ ժամանակվանից ի վեր նրան բազմիցս հորդորել են ներկայանալ Մայր Աթոռ, հանդիպել Վեհափառի հետ: Սակայն` Տեր Աբելը պարբերաբար խուսափել է ցանկացած տեսակի հանդիպումներից: Մի քանի անգամ Սուրբ Էջմիածինը բանակցութունների համար պատվիրակ է գործուղել Շվեյցարիա, սակայն Տեր Աբելը նրանց հետ հանդիպելուց էլ է հրաժարվել:
Վերջին փորձից հետո` Աբել քահանան պատրաստակամություն է հայտնել հանդիպել և քննարկել Վեհափառի հետ, սակայն` հաջորդ օրը` հունիսի 1-ին, Մար Աթոռը իրավաբանի կողմից հասցեագրված նամակ է ստացել, որում ասվում է, թե «եթե կարգալույծ անեք Աբել քահանային, մենք տեղի` Շվեյցարիայի օրենքներով կփորձենք պաշտպանել Աբել քահանային և քրեորեն պատժել Ամենայն Հայոց կաթողիկոսին, քանի որ եկեղեցական խորհուրդն է Աբել քահանայի գործատուն»:
Իսկ թե ինչու չէր հրաժարվում այդ քահանան իր «պաշտոնից» հարցադրմանը ի պատասխան` Տեր Արշակ եպիսկոպոս Խաչատրյանը պատասխանեց առանձնացնելով նյութական շահագրգռվածության գործոնը` «Նա համայնքից ամսական 8 000 եվրո աշխատավարձ էր ստանում: Երևի դժվար էր հրաժարվել նման գումարներից», - ասաց նա:
Լրագրողների այն հարցերին`թե որքան Գումար է ստանում Մայր Աթոռը Շվեյցարիայի թեմից` Տեր Արշակ եպիսկոպոս Խաչատրյանը պատասխանեց, որ թեմին տրամադրված միջոցները տնօրինում է միայն թեմը, այնտեղի գումարի 1-2 տոկոսն է հասնում Մայր Աթոռի գանձանակ` Մայր Աթոռը Շվեյցարիայի հայոց թեմի հաշվին «չի հարստանում»:
Փաստորեն` եկեղեցական խորհուրդը աշխատավարձի դիմաց «պայմանագրային» հիմունքներով գործի էր տեղավորել հոգևորականին:
Այժմ` Տեր Աբել քահանա Մանուկյանը կարգալույծ է արված Մայր Աթոռի կողմից և անվանվում է իր ավազանի անունով: Իսկ Շվեյցարիայում նա երևի թե դեռ կշարունակի «աշխատել» հոգևորական` ըստ պայմանագրի: Հայ Առաքելական Սուբ Եկեղեցին պատրաստ է զրկել նրան այդ գործունեությունից` նաև իրավական նորմերով:
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Նյութի և կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|