"Սթիվն այն պատվավոր ամերիկացիներից էր, ով քաջ էր ու մտածողությամբ տարբերվում էր մյուսներից, այնքան հաստատակամ, որ հավատում էր` կարող է փոխել աշխարհը եւ տաղանդավոր` դա իրականություն դարձնելու համար",- ԱՄՆ նախագահ Բարակ Օբամա:
Սթիվեն Փոլ Ջոբսը ծնվել էր 1955թ.-ի փետրվարի 24-ին՝ Կալիֆորնիա նահանգի Մաունթին Վյու քաղաքում: Մանկությունը եւ պատանեկությունն անցել է ազգությամբ հայ Կլարա եւ ամերիկացի Փոլ Ջոբսերի ընտանիքում, ովքեր որդեգրել են նրան: Կլարան ԱՄՆ է գաղթել Հայոց ցեղասպանությունից հետո՝ Արեւմտյան Հայաստանի Մալաթիա նահանգից: Որոշ աղբյուրների համաձայն, Ջոբսը վարժ տիրապետում էր հայոց լեզվին:
Առաջին կոմերցիոն համակարգիչներից մեկը Սթիվ Վոզնյակի հետ ստեղծել է 1970-ականներին: 1985 թվականին, տնօրենների խորհրդի հետ պայքարում, կորցնելով պաշտոնը՝ ժամանակավորապես հեռացել է "Apple"-ից եւ հիմնադրել "NeXT" համակարգչային ընկերությունը: Նրա բացակայության ժամանակ ընկերության վարկանիշը խիստ նվազել էր:
1997-ին Ջոբսը վերադարձել էր "Apple"` դրան միացնելով "NeXT"-ը: Հենց նրա ղեկավարության ժամանակ էր, որ ընկերությունը խոշոր ձեռքբերումներ գրանցեց:
Նրա մահն այսօր սգում են ողջ աշխարհում՝ ոչ միայն "Apple"-ի օգտատերերը, այլ նաեւ մրցակից-գործընկերները:
"Սթիվ, շնորհակալ եմ քեզ, որ եղել ես իմ ուսուցիչն ու ընկերը: Քո գաղափարներն ու նախագծերը կարող են փոխել աշխարհը: Ես քո կարիքը կզգամ",- ասել է Facebook-ի հիմնադիր Ցուկերբերգը։
"Հազվադեպ են ծնվում Ջոբսի նման մարդիկ: Նա այն վառ մարդկանցից էր, ովքեր կարողանում են անհամեմատելի ազդեցություն ունենալ ապագա սերունդների վրա: Նրա հետ աշխատելը մեծ պատիվ էր բոլորիս համար: Ես կկարոտեմ Սթիվին",- ասել է Բիլ Գեյթսը՝ "Microsoft"-ի հիմնադիրը։
Ջոբսի անվան հետ են կապվում ժամանակակից տեխնոլոգիաների այնպիսի նորարարություններ, ինչպիսիք են "Mac" համակարգիչները, "IPad" պլանշետները, "iPod" փլեյերները, "iPhone" հեռախոսները: Նրա մահվանից ընդամենը մեկ օր առաջ "Apple"-ը թողարկեց "iPhone" հեռախոսի նոր մոդելը: "iPhone 4S" մոդելի ներկայացման հանդիսությանը Ջոբսն արդեն ներկա չէր:
Շատերն այսօր ոչ միայն նախընտրում, այլեւ նույնիսկ չեն պատկերացնում իրենց կյանքն առանց "Apple"-ի: Ժամանակակից տեխնոլոգիաների նվաճումներից անմասն չի մնացել նաեւ հայ հասարակությունը: "Apple"-ի գրեթե բոլոր արտադրանքներն այսօր լայնորեն կիրառում են Հայաստանում: Մեր երկրում Սթիվ Ջոբսի հիշատակը նույնպես հարգել են: "Apple"-ի երեւանյան գրասենյակի մոտ մարդիկ բերել են ծաղիկներ, մոմեր ու լուսանկարներ:
Նյութը` yerkirmedia.am-ից 20:27 . 06/10
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին:
Կայքում արտահայտված կարծիքները կարող են չհամընկնել կայքի խմբագրության տեսակետի հետ:
Գովազդների բովանդակության համար կայքը պատասխանատվություն չի կրում:
Սթիվ Ջոբսը հավատում էր, որ կարող է փոխել եւ փոխեց աշխարհը