Արցախի աղանդավորները. Որոշել են վրեժ հանել դպրոցի տնօրենից
Չբավարարվելով այն բանով, որ առաջին ատյանի դատարանը բավական վիճահարույց վճիռ էր կայացրել՝ աղանդավորուհուն վերականգնելով դպրոցի իր աշխատանքին, նրա հայրը և ամուսինը որոշել են վրեժ հանել դպրոցի տնօրենից։ Սկզբում նրանք հոգեբանական գրոհներ են սկսել տնօրենի ընտանիքի վրա։ Մարիամի՝ ոչ մի տեղ չաշխատող ամուսինը՝ Արմենը, դպրոցի տնօրենին հայտարարել է, թե իրենք, բառացիորեն, «դուրս կմղեն ընտանիքը գյուղից, կամ էլ ինքը նրանց պարզապես կմորթի…»։
Համապատասխան կառույցներից պետք եղած հակահարվածը չստանալով` Մարիամի ընտանիքը վճռել է, որ իրենց ամեն ինչ թույլատրելի է։ Ավելին՝ նրանք, չամաչելով ամենուր հայտարարել են, որ լավ կապեր ունեն… ԼՂՀ կրթության և գիտության նախարարության ու դատարանի հետ։
Աղանդավորների ընտանիքն իր հայտարարություններն ամրապնդել է կոնկրետ քայլերով։ Չամաչելով ոչնչից և չվախենալով ոչ ոքից՝ նրանք բացեիբաց սկսել են դպրոցի տնօրենի ընտանիքի հանդեպ շանտաժը։ Նախարարության տեսուչների, ավելի ճիշտ՝ առաջին ատյանի դատարանի, որը աղանդավորուհու օգտին է վճիռ արձակել, դատավորներից մեկի հոր, ով ԿԳ նախարարությունում տեսուչ է աշխատում, միջոցով բացահայտ ճնշում է գործադրվել տնօրենի վրա։
Դրությունը, եթե իրականություն չլիներ, աբսուրդի թատրոն է հիշեցնում։ Պետական կառույցների՝ ընդդեմ աղանդների տարվող պայքարի ակտիվացման համապատկերին ընթանում է աղանդների դեմ հանդես եկած մարդկանց հանդեպ բացահայտ հարձակում։ Եվ հենց նույն պետական կառույցները ցուցադրում են լիակատար անտարբերություն, եթե չասենք ավելին։
Փաստը մնում է փաստ, որ դպրոցում կարգուկանոն հաստատել համարձակված մարդն աղանդների հարձակման ժամանակ հայտնվել է փոքրամասնությունում, իսկ պետությունը նմանվել է անկաշառ դատավորի, ով, չմիջամտելով ընդամենը դիտում է մենամարտը։
Նյութը` emedia.am-ից
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|