Դատ մամուլի դեմ: «Հայկական ժամանակից» խոշոր գումար կբռնագանձվի:
Երևանի Կենտրոն և Նորք-Մարաշ համայնքների ընդհանուր իրավասության դատարանը՝ դատավոր Կարինե Պետրոսյանի գլխավորությամբ, այսօր ընդդեմ «Հայկական ժամանակ» օրաթերթի վճիռ է հրապարակել։
Ըստ այդմ՝ ԱԺ պատգամավորներ Ռուբեն Հայրապետյանի, Սամվել Ալեքսանյանի և Լևոն Սարգսյանի օգտին «Հայկական ժամանակից» խոշոր գումար կբռնագանձվի։ Մասնավորապես, ըստ վճռի, թերթը պարտավորվում է պատգամավորներից յուրաքանչյուրին վճարել 2 մլն 44 հազար դրամ։ Պատգամավորները դրանով ուզում են վերականգնել իրենց պատիվը։ Ի սկզբանե պատգամավորներից յուրքանաչյուրը հայցով 2.5 մլն դրամ էր պահանջել թերթից։
Հիշեցնենք, որ պատգամավորները թերթի դեմ հայց էին ներկայացրել այն նյութի հրապարակումից հետո, որում նշվում էր, որ ՌԴ-ում հարուցված մի շարք քրեական գործերում հիշատակվում է նաև նրանց անունները։
«Հայկական ժամանակի» թողարկման պատասխանատու Հայկ Գևորգյանը Tert.am-ի հետ զրույցում այս վճիռը մամուլի համար վտանգավոր նախադեպ համարեց։ «Սա շատ վտանգավոր նախադեպ է լրատվամիջոցների համար։ Սա նշանակում է, որ այսուհետ որոշ մարդիկ սեփական դատարանների միջոցով վճիռներ կկորզեն, եթե իրենց վրա հղումով նյութեր հրապարակվեն»,- ասաց նա։
Հայկ Գևորգյանի խոսքով՝ այս նախադեպը կշարունակվի, իսկ հարվածի տակ կդրվեն հիմնականում ոչ իշխանական լրատվամիջոցները։
Թերթի ղեկավարությունը մտադիր է վճիռը բողոքարկել Վերաքննիչ դատարանում, չնայած, որ ակնկալիքներ չունի։ Հայկ Գևորգյանը տեղեկացրեց, որ Հայաստանում բոլոր դատական ատյաններն սպառելուց հետո կդիմեն Եվրադատարան։ Նշենք, որ դատարանն այս հարցը քննել է հունվարին 24-ին՝ առանց թերթի շահերը ներկայացնող փաստաբան Վահե Գրիգորյանի մասնակցության։ Փաստաբանը վատառողջ է եղել և նիստին չի ներկայացել, սակայն դատարանն այդ հանգամանքը հաշվի չի առել և գործն առանց նրա ներկայության է քննել։ Վահե Գրիգորյանը խոստացավ մեկնաբանություններ տալ վճռի ամբողջական բովանդակությանը ծանոթանալուց հետո միայն։
Նյութը` Tert.am –ից
Առանց հեղինակի թույլտվության մասնակի, կամ ամբողջական կրկնօրինակումը արգելվում է: Կայքի հեղինակային իրավունքները պատկանում են Հայկ Կիսեբլյանին: Կայքում արտահայտված կարծիքները կարող են չհամընկնել կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:
|