Փետրվարի 19-ին` ժամը 18:00-ին, Արարատյան Հայրապետական թեմի Առաջնորդանիստ Սուրբ Սարգիս եկեղեցու «Արարատ» հոգևոր միության հոգևոր հովիվ` Տեր Հակոբ քահանա Խաչատրյանի հրավերով Գերմանիայի թեմից Հայաստան ժամանած Տեր Արմեն քահանա Մելքոնյանը Սուրբ Սարգսում ամեն երեքշաբթի տեղի ունեցող խոկման արարողությանը խոսելու է «Արտաքսման կիրակի» քարոզ-թեմայով:
«…Եվ արտաքսեց նրան Աստված Եդեմի պարտեզից, որպեսզի մշակի հողը, որից և ստեղծվել էր»: (Ծննդ. 3:23):
Արտաքսման է կոչվում Մեծ Պահքի երկրոդ կիրակին: Օրվա խորհրդի և անվան մասին Աստվածաշունչ մատյանի Ծննդոց Գրքում գրված է. Նախապատմությունը հետևյալն է. մարդն ունկնդիր լինելով Սատանայի խաբեբայական խոսքերին, պատվիրանազանց գտնվելով` համտեսեց արգելված պտղից: Որպես պատիժ, մարդն իհարկե, անմիջապես չմահացավ, սակայն զրկվեց Աստծո կողմից շնորհված անմահությունից և անիծվեց: Այսուհետ, մարդն իր քրտինքով պետք է վաստակի օրվա հացը և կինը պետք է ցավով ու տառապանքով զավակ ունենա և վերջում էլ ասվեց նրան. «...հող էիր և հող կդառնաս» (Ծննդ.3.19):
|